個個用搜索引擎（Search Engines）🧑🏻💻就用得多喇，你有冇好奇過佢究竟係點運作嘅？點解一 search 就即刻有晒結果？佢究竟點樣通過我哋打嘅關鍵詞去比你哋睇到相關嘅結果？老闆sss 一定特別想知點解有啲人嘅網站頁面可以排到頭幾位？而家同新手解構最基本嘅原理啦❗
🌟咩係搜索引擎？🔎
佢係一種工具先利用爬蟲（Crawling）去收集成個網絡嘅網頁資訊，解析程式碼，然後將佢認為合適有用嘅網站建立索引（Indexing）儲存喺自己嘅 database 入面，就好似係互聯網嘅目錄咁，再用佢獨特嘅演算法去做排序。當用戶喺搜尋嘅時候，佢就會檢索（Retrieving）番索引，即時將最相關嘅內容 show 出嚟。
簡單啲講，佢嘅 database 就好似超級市場嘅貨品咁，啲貨架分晒種類，而 Google、Bing 或者 Yahoo 就係超級市場嘅員工幫你去搵番相關貨架揀佢認為最好最熱門嘅貨品比你睇。
🌟搜索引擎點樣決定顯示邊啲結果？
大家最關心嘅事就緊係網頁嘅排名啦，呢度就唔會超級詳細話比大家聽，有興趣可以睇番之前有關優化 SEO 嘅帖文啦😎但係最最最基本嘅你係必須要知咗先👇🏻
1️⃣ 關鍵字匹配：
佢會優先顯示番有包含你搵緊嘅關鍵字網頁，之後先會係可能淨係包含咗一兩個字嘅結果。即係你輸入咗「Bing AI 繪圖 香港」，但因為香港地區用唔到，佢就會優先顯示番一啲教學點樣可以跨地區用到嘅網頁比你睇。
2️⃣ 網站權威性：
佢會考慮番網站嘅信譽同埋同其他網站嘅連結情況決定，即係要經常更新，內容係冇錯等，同埋會有一啲有質素嘅反向或者正向連結友好同相關嘅其他網站。
3️⃣ 內容質量：
佢會評估番網頁內容嘅有用性同獨特性，即係唔可以係由大量關鍵字堆砌出嚟嘅廢文、資料來源模糊、抄襲已經存在嘅文案等等。
4️⃣ 使用者行為：
佢會根據番歷史搜索嘅數據同點擊率去優化結果頁面。
唔好睇少呢個原理嘅重要性呀❗當你了解咗搜索引擎嘅三個階段👉🏻爬蟲、索引同埋檢索，對你去計劃 SEO 行銷策略係非常之有幫助㗎！即係如果你嘅網頁質量好差又冇咩文字，爬蟲爬唔到有用嘅資訊就未必會將你嘅網站擺入佢嘅索引入面，又或者內容非常正，角度又獨特，但你冇將關鍵字擺入去，索引又點搵到你嘅網站呢，咁又點會檢索到比用戶睇😔萬變不離其宗，只要你掌握好基礎，再去學習多啲有關優化 SEO 嘅文章就唔會搲爆頭唔知佢講咩而應用唔到啦✊🏻
