詐騙訊息就收得多喇，有冇諗過連電郵都有詐騙❓明明都冇訂閱到，又成日收到啲出名企業傳送嘅好緊急或者優惠介紹嘅電郵內容，經常都要你㩒入連結先拎到某啲優惠😵💫你有冇諗過呢啲連結可能係虛假嘅欺詐惡意網站呢❓而家教你簡單識穿詐騙電郵，唔洗再心慌慌驚比人呃咗啲個人資料啦✨
🌟四步識穿詐騙電郵
1️⃣ 檢查寄件人域名：
呢個係最簡單同基本嘅方法去檢查係咪詐騙電郵，詐騙者好多時會將相似字母或者數字替代，等你以為係真實大公司嘅正規電郵，例如 [email protected] 就係用咗 “1” 去代替咗 “l”，基本上出現最多替代情況就係👉🏻 “O” 改 “0”、“rn” 改 “m”。
2️⃣ 快查可疑特徵：
你可以用最基本嘅知識去推斷唔合理嘅寄件電郵，例如大企業根本唔會用免費信箱，例如匯豐銀行唔可能用 [email protected]，又或者要你喺網上直接提供完整敏感個人資料，例如銀行密碼。又或者唔會有一啲嘅緊急嘅要求，通常都包括咗一啲威脅利誘嘅情況，例如要你 24 小時內回覆，如果唔係就會停用你嘅戶口🥶
3️⃣ 查證連結：
呢樣係最令人防不勝防嘅嘢，因為除咗連結網址同網址文字唔相符之外，縮短連結嘅網址都係詐騙者嘅生財工具，而且大家都可能慣咗照㩒呢類型嘅連結，真係有機會入咗詐騙者嘅騙局入面㗎🥲咁你一定會問點樣先查證到連結呀❓
🌟 滑鼠懸停喺連結上面就會喺下面顯示真正嘅網址係咩
🌟 用連結掃描器，例如 Norton SafeWeb, URLVoid, VirusTotal 去掃描連結
🌟 將縮短網址還原，例如 CheckShortURL 或者 Unshorten.It! 去睇睇佢原本係咩網址
4️⃣ 內容紅旗：
電郵內容都係重中之重，好多時欺詐電郵都係有唔自然嘅稱呼，例如 Dear Sir / Madam、明顯嘅文法錯誤，或者要求電郵回覆敏感資料，見到呢類嘅內容都要小心呀👀
遇到欺詐電郵唔洗驚嘅，最近要做到以下嘅四部曲就唔洗怕啦😆
1️⃣ 唔好㩒任何連結同附件
2️⃣ 截圖存證
3️⃣ 回報釣魚郵件
4️⃣ 立即刪除勿轉發
無論係短訊、WhatsApp 訊息定係電郵，你都要保持謹慎嘅心，就唔洗怕跌入騙徒嘅陷阱✨所有重要嘅帳戶都要記得定時改密碼、用雙重驗證，增加帳戶嘅安全❗
