你有冇諗過機器係點樣理解同處理人類嘅語言呢？尤其係 AI 點樣由我哋嘅咒語去生成文章或者圖片？呢樣就涉及到自然語言處理（NLP, Natural Language Processing）。佢結合咗語言學、計算機科學同埋 AI 嘅技術，令到機器可以明白、分析同生成人類嘅語言。
🌟咩係自然語言處理（NLP, Natural Language Processing）❓
佢係一種機器學習技術，令電腦可以理解同生成人類語言。喺資訊爆炸嘅年代，你係好難可以逐一分析所有內容㗎，例如搜尋引擎上嘅資訊、電子郵件、社交媒體同新聞等，但又需要喺短時間搵到最需要嘅資訊，而 NLP 嘅技術可以喺好短嘅時間處理呢啲資訊同淨係幫你搵到最重要同相關嘅內容，甚至做到即時回應我哋嘅問題。
🌟自然語言處理嘅應用
1️⃣ 聊天機器人：
喺以前企業為咗解決到客人嘅問題，基本上需要有專人 24 小時全天候待命，唔只成本高，客服嘅質素仲會好影響客人對企業嘅形象。而家唔少嘅企業都會用聊天機器人提供即時服務，帶比客人更加準確嘅資訊同個人化服務，例如匯豐理財APP入面嘅客服正正就用緊呢樣嘢。而佢就係利用 NLP 技術去理解客人嘅問題同提供準確嘅回覆。
2️⃣ 電子郵件篩選：
佢係 NLP 最初同最基本嘅應用之一，用呢個技術搵出喺垃圾郵件經常出現嘅關鍵詞去分類出垃圾郵件，然後掉去垃圾桶，唔洗再嘥時間逐一清理或者受到惡意郵件嘅攻擊。而家嘅 Gmail 都係用 NLP 嘅方式幫你將郵件分類做主要郵件、社交網絡類別同促銷內容，等你冇咁影忽略咗重要郵件。
3️⃣ 語言翻譯：
呢樣相信絕對係大家用得最多嘅功能，亦都見證住佢不斷優化而做到越嚟越準確😎不過雖然而家嘅翻譯做得越嚟越好，但都係未可以取代到人類。不過可以令大家慳到唔少時間，而要喺句子入面呈現唔同嘅情感表達就好靠人類去改寫喇。
4️⃣ 搜尋引擎：
佢都係利用 NLP 去根據番類似嘅搜尋行為同做用者意圖顯示相關嘅結果，例如當你喺 Google 搜尋文字嘅時候就會預測邊啲熱門搜尋係你想查詢嘅相關主題。唔只係文字㗎，當你輸入航班編號就會睇到航班狀態，或者輸入電影名都會出現預告、介紹、評分，同埋連結去各演員嘅頁面。
5️⃣ 金融服務：
NLP 喺呢個領域會應用喺信息提取、情感分析、風險評估同詐騙檢測等，可以幫到金融機構處理大量嘅文本數據，做到更準確嘅預測同決策。
6️⃣ 醫療保健：
NLP 可以幫手分析醫學文獻、病歷記錄同臨床報告，提供比醫生同研究人員更加全面嘅信息。佢仲可以幫手解決醫學術語嘅理解同翻譯問題。
NLP 嘅應用絕對唔只呢幾方面，大家而家成日用嘅 ChatGPT 其實都有用到呢個技術去生成文本㗎，Apple 嘅 Siri、Google 嘅 Google Assistant 都係用呢個技術去理解大家嘅指令。作為一個人類，大家多數好少去諗究竟語言複唔複雜，但作為 101010 嘅電腦要去理解人類嘅語言係需要大量嘅深度學習㗎，絕對唔係一件非常容易嘅事✨
